Archive

Posts Tagged ‘Pipinu Mereu’

Un’atera poesia – de lèghere e ascurtare

17/11/2010 Leave a comment

Galusé

Gentile signorina,
chi cal’abe a sas ros’ a mie  ‘olas,
umil’ e peregrina
bundo tra sos fiores e nucciolas;
so frisca e cristallina,
si t’abbascias a mie ti consolas.
A su cantaru meu
fritti sas laras, ca nd’ as ingranzeu.

Deo, bundantziosa,
so fentomada tra funtanas raras,
cun totus amurosa,
so dispensera de sas abbas giaras:
s’est chi nde ses bramosa
a mie fritt’ un’istante sas laras.
Si gustas abbas mias
des isclamare: «Beneitta sias!».

Chi frisch’ e pura sia
l’ischit Cabu ‘e Susu e Campidanu.
A sa friscura mia
benint sididos dae su pianu;
cun d’un’istill’ ebbia
s’esser malàidu torro sanu.
Dae lontan’ in s’istiu
totus bramant su meu murmuriu.


 

Eo so Galusé,
logu delissiosu de incantu,
fìrm’ inoghe su pe’,
o passitzeri, cust’est logu santu:
deo cunfid’ in te,
tzert’ as accurrer a mi dare bantu,
cun bellas cumpagnias,
a t’infriscare de sas abbas mias.

Umil’ in custa rocca
mai de murmurar’ apo tzessadu,
bentu fritt’ e fiocca
ant sas venas mias astragadu,
mai però sa brocca
at su nettare sou ismentigadu;
pedidu m’at continu
sos bundantes umores c’apo in sinu.

Ancoras o’ in die
non mi mancant dulzuras e bisitas.
Totus current a mie,
e si consolant de sas abbas frittas,
e deo, rie rie,
cuntento broccas mannas e brocchittas.
Dae custas frittas benas
semper partint sas broccas pienas.

A cust’abba, sididas,
sunt bennidas donosas virginellas,
a mie sunt bennidas
bajanas de Sardigna sas pius bellas;
totas si sunt frittidas
a mi fagher onore. Pastorellas,
signorinas e damas,
de me cuntentas, nd’ant contadu famas

Dae logos istranzos
bennìdu b’at dottissimas persones,
e in festas e pranzos
cottu b’ant crabittos e anzones,
e mandigos licanzos:
puddas, porcheddos, pisch’  e maccarrones.
In custas abbas puras
ant ismaltidu tzelebres cotturas.

Totus ant divertidu
ismentighende d’ogni cuntierra,
preideros ap’ idu
cottos, cantend’ a sonu ‘e chiterra;
anzis nd’ ap’ assistidu
beatamente istrampados in terra,
in bratzos d’una vera,
solenne, reverenda imbreaghera.

Inoghe sa tristura
morit, e torrat s’animu serenu.
Sa sogra cun sa nura
in custas abbas lassant su velenu,
anzis si dana cura
de lassare s’immina in su terrenu,
c’ant fattu s’angallitta
unidas a pediren’ abba fritta.

Totus sunt uguales,
inoghe nemos vantat sos blasones.
Baculos pastorales
s’aunint a ispadas e bastones.
Totu parent fedales
sas betzas cun sas giovanas persones,
betzones e battias
torrant piseddos a sas abbas mias.

Odios e affectos
in me ant imprentadu sos ch’ ant bidu,
ma deo sos secretos
apo gelosamente custodidu,
ca non sunt indiscretos
sos umores ch’ in bid’ apo sumidu.
E narrer ch’ isco cosas
chi parent finas meravigliosas!

Frisca, bundant’ e pura,
cantas festas apo bidu, e cantu giogu;
basos dados a fura,
toccos de man’ e miradas de fogu.
Ap’ intesu sa giura
de s’amant’ a s’amada; in custu logu,
tra cantos e festinos,
n’apo bidu… una fila de puntinos.

De’ apo bidu betzas
benner de nott’ a custu logu santu,
crabolas in palettas
de fagher meravigli’ e ispantu,
e ateras suggettas
incaratzadas de nieddu mantu:
cuddas pius santiccas
s’ant bagnadu sas laras tantu siccas.

De’ ap’ intesu cosas
chi a las narrer non parent costadas.
Tzetras armoniosas
fruscios de contrabband’ e muiladas;
umbras misteriosas
fattu ball’ ant segundu sas sonadas,
e ateras cosas puru,
chi no ap’ ‘idu pro esser iscuru.

Bajanas samunende
intendo criticar ogni persone,
sas tales critichende
su mal’ anzenu l’ischint a cantone:
una s’est lamentende
chi l’ant male pesadu su sabone,
un’ater’ a dovere
criticat sas camisas de su mere.

Mi bantant sos dutores
bera recepta de sa gent’ istittica,
a sos meos umores
benid’ a si purgare sa Politica.
Muzeres e segnores,
a s’ora de su votu tantu critica,
inoghe, saturnale,
dant su famosu pranzu elettorale.

Tando sos maccarrones
morint in buccas dottas e famidas,
misciados a sermones
e a bellas promissas non cumpridas.
Cantas discussiones
galu vivas in me sunt imprimidas!
Ma de tantas paraulas
nd’ ap’ incunzadu? Unu saccu ‘e faulas.

A sas friscuras mias
benint a fagher paghe sos contrarios.
Diversas rettilias,
preides, politzotos, cummissarios
e nobiles ispias,
inoghe si dant festas e isvarios.
Inoghe su delitu
fatt’ at cun giustissia s’ojitu.

Inoghe s’allegria
mai si ponet abidos de dolu.
Intes’ ap’ a Pipia
cantend’ a zirfa cun su russignolu;
sa suav’ armonia
de cussas boghes m’at dadu consolu.
A sos cantigos graves
rispost’ apo cun murmuros suaves.

Un’epoca beniat
unu giovanu pallid’ e ramasu,
inoghe invocaiat
sas noe virginellas de Parnasu:
afflittu pianghiat,
e mentres chi m’imprimiat unu basu,
misciaiat amaras
lagrimas a sas mias abbas giaras.

Fit affligidu tantu
chi li naia su misteriosu,
flebile unu cantu,
in laras l’intendia dolorosu.
Com’ in su campusantu
creo chi dormat s’ultimu riposu.
Non pius b’est bennìdu,
nè una cara novella nd’ ap’ ischidu.

Ischire nde cheria:
galu l’apo costant’ in s’intellettu,
prit’ una poesia
m’at iscrittu gentil’ e cun affettu;
servidemi de ghia
s’ a cas’ est galu vivu su suggettu.
Nadel’ o signorinas
chi torret a’ custas abbas cristallinas.

Si mai l’azis bidu,
breve nde fatto sa biografia;
est pallidu, bestidu
a pannos tristos de malinconia,
mesu test’ ispilidu,
in laras si l’annottat s’angustia:
est debile de fìsicu,
camminat a istentu, paret tisicu.

Bizarr’ est e selvaticu,
paret un’isciareu ‘estid’ a pannos:
né bellu né simpàticu,
cumparit betz’ e at vintichimbannos,
in sa fronte: «Viaticu»
giughet iscritt’ a caratteres mannos:
distint’ est sa persone
sorr’ a s’inseparabile bastone.

S’ a casu l’incontrades
in s’umanu consorziu vivente,
de coro li pregades
chi mi fettat bisita prontamente,
anzi li consizades
chi torret prestu allegramente;
nadeli chi Fulana
est torrad’ amuros’ a sa funtana.

O bellas tzittadinas,
lassade sas gazosas e limones:
cussas sunt meighinas
de chie giughet frazigos pulmones,
si custas cristallinas
abbas bidides vivides ruzones,
sanas coment’ e dindos,
e chi s’impicchent a sos tamarindos.

E tue, imbreagone
chi giughes in sa ‘ula sa siccagna,
e cottu su pulmone,
cun sa test’ attontada de migragna;
su bin’ in su pistone
lass’ e ben’ a inogh’ a sa muntagna
e curad’ in sas veras
abbas friscas – istud’ imbreagheras.

Tue o Lia cara,
de custu logu des esser sa prama,
che a’ cust’ abba, giara
cunservadi onorad’ a babb’ e mama:
fentomada pro rara
in virtudes, belles’ onor’ e fama.
Chelzo chi s’abba mia
potat narrer: «So pura che a Lia».

Como benis a mie
senz’ algunu penseri, ses minore:
gentil’ e rie rie,
bestida ‘e pures’ e de candore,
goi pur’ unu die
benzas in cumpagnia de s’amore.
Su die, o Lia cara,
m’as agattare pius frisca e giara.

De coro su disizu
apo chi sias mia fittiana:
rosa ses, cun su lizu
ben’ a inoghe donosa e galana,
s’intemeradu chizu
cunserva sorrident’ a sa funtana,
c’at àpidu sa fama
de aer cumbidad’ a babb’ e mama.

De sa pur’ abba mia
ben’ e leande cun devossione:
la giughes a cresia,
li faghes dare benedissione;
pro chi servat, o Lia,
cando chi su preide s’unione
suggellat, de su coro
chi t’amat, a su tou, o rosa d’oro.

Pipinu Mereu. Tonara-Galusè, Martzu 1897.

 

Categories: Poesias Tags: ,
%d bloggers like this: