Archive

Posts Tagged ‘Ballu de sas Gatias’

Su Ballu de sas Gatias

17/07/2011 Leave a comment
Sa costellatzione de sa Corona Borealis est unu grustu minoreddu de isteddos, a forma de mesu chircu, chi si distinghet bene in su chelu de note. Inoghe suta sunt mustradas duas imàgines, sa prima tenet sa trassa de sa costellatzione cun sos isteddos marcados (punghide·bi pro las ismanniare).
https://i0.wp.com/www.telefonica.net/web2/astromodelismo/Web%20Astronomia/Datos%20web/Tomas%20astronomicas%20propias%20web/Constelaciones/Datos/Reales/Con%20Leyenda/Leyenda-Corona-Borealis.jpg

https://i2.wp.com/www.telefonica.net/web2/astromodelismo/Web%20Astronomia/Datos%20web/Tomas%20astronomicas%20propias%20web/Constelaciones/Datos/Reales/Sin%20Leyenda/final-Corona-Borealis.jpg

Sa Corona Borealis est piatzada intre Ercule e Bootes, supra su cabu de su Serpente, tantu chi in tantas culturas li narant fintzas “Sa Conca de su Serpente”. Pro l’agatare pompiade s’imàgine inoghe giosso:

https://i0.wp.com/astrobob.areavoices.com/astrobob/images/thumbnail/Aug7umaAnnotated.jpg
Comente agatare sa Corona Borealis. Dae http://astrobob.areavoices.com

moende dae su Carru Mannu (sos Sete Frades), a bia de su giuu de su carru, agatades Bootes cun s’isteddu Arturu (lughente e ruju). Dae cue est fatzile a nche tennere sa Corona Borealis e in particulare s’isteddu primargiu, chi benit giuliadu Gemma (prenda in latinu).

In su ditzionariu de su Spano su nùmene de custa costellatzione in sardu est “Su Ballu de sas Gatias” (gratzias a Lisandru pro l’àer mentovadu in su Tzilleri). No apo agatadu àteros iscuntrobos indipendentes, e non connosco su sentidu de custu nùmene. Ma chie fiant sas gatias e proite sunt ballande?

Prima de proare a respundere a custa dimanda, bidimus comente est bista custa costellatzione in sas àteras astronomias populares:

Astronomia Tzinesa

Sa Corona Borealis est una de sas pagas costellatziones chi sos astronomos tzinesos bident a sa matessi manera de s’astronomia classica, a forma de chircu. Issos ant marcadu noe isteddos in un’aneddu, dae Pi a Rho Coronae Borealis. Pro issos custa fiat una presone pro traballadores, giuliada 貫索 (Guan Suo, sa corria alloricada). Faghiat parte de sa Cresura de su Mercadu Tzeleste, su 天市垣 (Tian Shi Yuan), una de sas tres cresuras chi cumponiant sa regione a intundu de s’isteddu polare.  Pro sos nòbiles bi teniant un’àtera presone, 天牢 (Tian lao), chi istaiat in una parte de chelu prus dèchida (a contu insoro) e currespundiat a sos Sete Frades.

Astronomia Clàssica

https://i1.wp.com/chandra.harvard.edu/graphics/constellations/bootes_hev2.jpg
Sa Corona Borealis,  dae sa Uranographia de Johannes Hevelius (1690). Sa corona est intundada dae Bootes, su pastore, a manu manca, dae sa serpe a bia de giosso e dae Ercule a manu dereta.

Arianna (Αριάδνη, Ariadna in latinu), fìgia de re Minosse de Creta, est nòtida in sa mitològia clàssica ca at agiuadu Teseu a ochidere su Minotàuru. Custu fiat un’ispètzia de èrchitu, frade a un’ala de Arianna, ca fiat nàschidu dae sa mama Pasifae e dae unu trau sacru. Minosse inserreit su Minotàuru in unu labirintu disignadu dae su mastru artisanu Dèdalu. Sa trassa de su labirintu fiat tantu imboligosa chi, nen su Minotàuru, nen àtera gente, resessiant a intzertare s’essida. E ogni annu pretendiat dae Atene, chi fiat suta de su regnu suo, sete pitzocos e sete pitzocas pro las dare a mandigare a sa fera sacra.
Teseu, fìgiu de Egeu re de Atene, detzideit de moer a Creta pro ochider su Minotauru e acabare custa malasorte. Arianna s’ammoreit dereta de issu, e pro l’agiudare, cun su cunsìgiu de Dèdalu, li desit una madassa de filu. In custa manera, ligande unu cabu in sa ghenna de su labirintu e lassande istèrrer su filu, l’est istadu possibile agatare s’essida, una borta mortu su Minotauru.
Teseu pigheit cun secus Arianna, chi fiat prìngia. Ma arribados a s’isula de Nassu, l’at piantada incue a sola (dae tando si narat “piantare in Nasso” mudadu posca in “piantare in asso”). E in s’interis chi fiat setzida pranghende e frastimande s’òmine suo pro sa disconnoschèntzia, passeit Dionisiu, chi resteit ispantadu dae sa bellesa de sa printzipessa, tantu chi l’at cherfida a mugere.
Sa corona fiat su donu de Afrodite pro sa cojua, fraigada dae Efestu su deus de su fogu e mastru de fraile. In àteras paristorias sa corona la doneit Teti (ninfa de mare e mama de Achille) a Teseu, pro chi su lugore de sas prendas l’agiudaret a agatare s’essida dae su labirintu.
Comentesisiat, a pustis de sa morte de Arianna, Dionisiu at tiradu sa corona a chelu, e sas prendas si sunt mudadas in isteddos. S’isteddu prus lughente si narat “Gemma” chi in latinu cheret nàrrere prenda, ma portat finas su nùmene de Alphekka, comente si narat in arabu sa costellatzione intrea.

Astronomia Cèltica

In sa mitologia cèltica sa Corona Borealis est su Caer Arianrhod, su casteddu (Caer) de Arianrhod (Roda de Prata), chi est sa dea de sa Luna. Cunforma sa traditzione populare de su Galles, b’est unu marràrgiu in s’oru de su mare de Gwynedd, in su nord, giuliadu Caer Arianrhod. Cumparit cun sa marea bassa e est totu su ch’est abarradu, in custu mundu, de su regnu de sa dea, ue s’inghitzaiant sos poetas e sas animas chi debiant torrare a naschire.

Astronomia Sarda

S’unica idea chi m’est bènnida a mente pensande a unu ballu de gatias, est ligada a su ballu de s’àrgia. Custu fiat unu ballu rituale chi si faghiat pro curare sa punta de s’àrgia (latrodectus tredecimguttatus) un’arangiolu nieddu chi tenet finas a treighi macras rujas in ischina.

Àrgia. Foto tirada dae Domenico Ruiu http://www.sardegnadigitallibrary.it/

Si pensaiat chi s’àrgia esseret istada un anima in pena, chi intraiat in su corpus de unu malassortadu e nde lu giughiat a sa morte. Sas àrgias podiant èsser bagadias, cojuadas e gatias, ma finas partòrgias, mamas, pipias e betzas . E su marturiu, , òmine o fèmina chi esseret, debiat istòrchere s’argia in unu rituale chi fiat unu beru e pròpriu esortzismu. Comente a si fagher collionare dae cantzones de amore o ninnare, prànghere e atitare unu mortu, sunfrire pro s’illierada, o ammamare una pupa de istratzu a ghisa de criadura.

De modas bi nd’aiat tantas cantas sas biddas (comente a semper). In carcuna su martùriu beniat imbendadu cun unu mucadore e postu dae in antis a unu frama pro purificare, in àteras lu carragiaiant de ledàmene, semper pro lu fàgher suorare. E a bortas lu intundaiant in unu ballu dae noe a bintiunu fèminas, gheretzadas cunforma sa natura de s’argia, gasi comente su martùriu. Si s’argia chi aiat puntu fiat gatia, pro nche la catzare, beniat bestidu de nieddu cun s’issallu de sas biudas e istorchidu unu funerale, cun sas gatias chi li ballaiant a inghìriu.

Est possibile chi sos Sardos apant bidu su ballu de s’àrgia in sa forma de sa Corona Borealis, ponende·nche unu ballu de gatias in su stendardu?

https://i2.wp.com/www.telefonica.net/web2/astromodelismo/Web%20Astronomia/Datos%20web/Tomas%20astronomicas%20propias%20web/Constelaciones/Datos/Reales/Sin%20Leyenda/final-Corona-Borealis.jpg

ballo vedove
Il ballo delle vedove de Giuseppe Ferrara, 1963, Archivio Cineteca Sarda

Un’àtera cosa curiosa: Àrgia (Aria) , Ariadne e Arianrhod, tenent carchi cosa a cumone?

Sunt benènnidas totus sas informatziones e ideas.

____________________________________________________________________________________________________________

Sardu: Su Ballu de sas Gatias
Cymraeg: Caer Arianrhod
Latinu: Corona Borealis (CrB), Serpens [Caput] (Ser)
Tzinesu: Guan Suo
____________________________________________________________________________________________________________
gatia (lat. Captiva) = [gatia], [gativa], [agatia], [batia], [atia]
biuda (lat. Vidua) = [viuda], [biuda], [fiuda], [fiura], [viura], [bìdua], [vìdua]
%d bloggers like this: