Chistione in Foresta ‘e Burgu

15/09/2012 1 comment
Fotografia tirada dae Juanne Carru – modellu Pretu Jorgi Banninu © 2012 Giovanni Carru http://www.giovannicarru.it

 

Don Remundu Matzu, curadu de Bono, si nch’est pesadu chitzo cuddu mangianu. L’aiat giuliadu su Piscamu de Othieri – cun una lìtera de pagas dies in antis – pro arresonare de chistiones pagu craras a pitzu de sas fainas de sa Crèsia. Moeit a caddu a puddiles a bia de sa Foresta de Burgu, pro sighire a bia de sa bidda de Itireddu e in fines a Othieri. In sa carrera iscura chi si nch’apiligat peri sos montes non si resessiat a annodare nen mancu su coddu dae ue si pesat su Casteddu de Burgu, a manu manca: «Un’àter’ora, e su sole nch’est giae artu» murmuteit intro de se, in antis de comintzare a paternostrare a buca serrada, unu pagu pro colare ora, unu pagu pro si nche catzare sa tzudda. A pustis de una mes’ora de Pater – in fines – li tocheit sas palas sa lughe de s’arbèschida dae Monte Gonare. Intro de se penseit: «E custa borta puru sa Madonna m’at amparadu: non si nch’est bidu manc’unu de sos brichis chi cundint sos montes de sa Costera». Postu de ànimu illestrigat su passu, cun su disìgiu de nch’esseret istadu dae S’Ecellèntzia Sua antis de mesudie.

A bia de sos càntaros de sas Enas Noas – cando sa picada mudat in logu paris  e non paris – unu nuscu potente de tabbacu l’intrat in nastulas. Non si nd’est trèmidu, ca ischiat chi non fiant malefaghentes. Cussu nuscu non si podiat confundere cun àteros: Tziu Bachis De Logu, artziende a bidda dae Mores, pipende.

«Salude, Don Remù, ite bi seis faghende a custas bandas gasi chitzanu?» giubilat Tziu Bachis a dinco lu bidet.

«Salude a bosté, Tziu Bachis, ghirende dae Mores? Deo so andende a Othieri, ca tèngio un’abboju cun S’Ecellèntzia Sua su Munsegnore» respondet Don Remundu.

«Ah, de acarare a Munsegnore tenides, da mi potzo figurare su proite. Prus chi pro un’arresonada, mi creo mi creo, chi at a esser pro su pagamentu de sa parte de sa Diòtzesi!» li tzirriat riende Tziu Bachis.

«E “parte” chi non ses! Sos fideles non donant nudda a sa Crèsia. Sas annadas sunt malas e dinari a Costera non nche nd’arribat! Petzi carchi ànima piedosa mi batut de in tantu in tantu una forma de casu o unu casigiolu. Ca si no, non dia ischire nen mancu comente mi disganare. Mala tempora currunt! Prus a prestu bosté, Tziu Bachis, ite bi seis trabichende in sas bassas? A ite bi seis faladu a Mores?».

Tziu Bachis si corfeddat sa pipa morta in su parmu de sa manu e collit su restu de sa chisina e de su tabbacu in su puntzu. Falat dae caddu e tzochende su pee a tempus in s’andala pruerosa narat:  «Negòssios! Don Matzu, petzi negòssios!»

«Eh, da los connosco sos negòssios tuos, da» narat riende su pride, e sighit: «Bosté est andende a Mores pro bandire sas ideas malaidas bostras. Libertade, ugualàntzia e fradellàntzia! Ma cale libertade, ma cale fradellàntzia? E no alleghemas posca de custa idea maca de s’ugualàntzia. Domine Deus non nos at fatu totus uguales! Semus uguales petzi in cara sua, in sa bida eterna, cun sos pecados nostros, sas tentassiones nostras e sas mancàntzias nostras! E no alleghemas posca de cudd’àteru issollòriu: sa partione de sos podèrios. Sa Podestade est una, falat dae Deus, e est donada a unu e a unu e bia. Cun sa benedissione de Sa Santidade Sua su Papa, est de intèndere. Gasi gandat su mundu, ca gasi debet andare! Lassa su mundu comente l’as connotu…».

Tziu Bachis, si carignat sa barba orammai  cana, si collit sa pipa intro de sa bèrtula e isborrochit in unu risu a iscacàrgios, che a semper, cando comintzat a s’anneare: «Ah, tando sos òmines non sunt uguales? Pròprius bois lu natzes, bois chi faeddades, a sos fideles bostros, de s’Evanghèliu? Sos òmines sunt uguales, custu est su beru, ca nemo podet detzìdere pro totucantos, tra s’àteru, pro s’interessu suo personale e de sos custrintos suos, a banda de bois de sa Crèsia Catòlica, est naturale. Su mundu at de furriare. E in prus, sa partione de sos podèrios, chi tantu bos dat anneu, est de fundamentu pro istransire s’arbìtriu de su potente contras a su malefadadu. De su ricu contras a su pòberu. Apo intregadu tota sa bida mea pro custos ideales. Sisse, beru est, derrutu so. Sa Revolutzione Frantzesa est morta. In Vienna aes cumandadu de torrare a s’anticu.  Ma datze cara, ca de una cosa nde so cumbintu: nemo podet torrare a palas cando sas ideas noas sunt orammai ispainadas. Seis petzi illusos, mischineddos de bois. Maghiàrgios dischentes chi punnant de torrare su Diaulu a intro de s’ampudda.
Ma nemo b’est mai resessidu. Su Papa bostru, s’austriacu Metternich e totus sos àteros, petzi illusos sunt. Da s’ant postu in sa trona de Frantza su Re Borbone. Ma sas ideas girant, si ispainant e non si podent firmare.»

«Ah, su bisu de sa Revolutzione Frantzesa. Sa revolutzione de bosàteros. Ma a ite est servida? B’at essidu petzi unu mare de sàmbene. E duncas, pròpiu bosté abòghinat? Bosté, pròpriu bosté, chi custas cosas las connoschides dae a curtzu. Fradile bostru, Juanne Maria est mortu pòberu, pro custos machines. E non lu podides nen mancu prangher in sa tumba, da chi l’ant interradu in unu fossu comunu in Parigi, che a unu remitanu. Ohi ohi Tziu Bachis! Si esseret istadu pagu pagu prus abistu. Si no aeret iscassadu dae tula cun custas ideas cando l’ant fatu Alternos. Ah, si esseret abbarradu in tinu, un’impèriu aiat poidu fraigare. E deo puru, su curadu de Bono, dia poder esser istadu su retore de una bidda de importu mannu. A su pòpolu tocat de lis dare sa possibbilidade de papare e de creer in carchi cosa. Sos deretos? Ma cale deretos, a si podet ischire? De sos deretos cussos non nde cumprendent una chibudda! Tocat a li dare firmesa in sa cosas, non dudas, a cussu chi bosté giuliat su Pòpulu. Sunt berbeghes gaddinosas chi tenent bisòngiu de duos canes pro las defensare dae sos lupos e de unu pastore de lis dare cara».

Tziu Bachis brinchende torra a caddu respondet: «No, non berbeghes de atèndere, ma de mùrghere e a bortas fintzas de masellare in sas gherras de bosàteros. In bon’ora segnor curadu de Bono, tzitade mancada!».

«In bon’ora, Tziu Bachis. Ammentade peroe chi est gasi chi andat su mundu e gasi at andare, fintzas tra mill’annos. Caru su meu revolutzionàriu mancadu!».

Contu buscadu in su blog Zeroconsesus

Categories: Contos

A Iscola de Democratzia.

31/05/2012 1 comment

Carcunu de bois s’est cumbintu chi sa democratzia siet a giogare cun sos pursanteddos colorados, sos microfonos lampantes e totu cussos emendemamentos curiosos chi s’agatant in sos parlamentos.

Ma su chi apo de bos nàrrer est prus importante. E cando aes a diventare prus sàbios m’aes a rengratziare.

Ite est sa democratzia?

Sa libertade de paraula!!!

Nosse, sa democratzia no est sa libertade de paràula, de assotziu e cosas de gai. Custas cosas si narant deretos tziviles.

Torrade a lèghere: D·E·R·E·T·O·S T·Z·I·V·I·L·E·S

Sos deretos tziviles bi podent istare fintzas in un’ordinamentu non democràticu, comente, pro nàrrere, un aristocratzia liberale, chi est unu logu ue ognunu podet nàrrere e fàghere cussu chi cheret, bastat chi sa persona sua contet unu nudda.

E dade cara chi non so nende chi un’aristocratzia liberale est mègius o peus de una democratzia, ma petzi chi est una cosa diferente. E est cosa de improtu primàrgiu a distìnghere sas cosas diferentes, ca si no unu si confundet e macari andat a s’istancu a leare sigaretas e nche ghirat cun una bustedda de democratzia.

Sa democratzia non sunt sigaretas, non sunt deretos tziviles, e mancari bos resurtet dificurtosu de credere, no sunt mancu sas eletziones.

Sa democratzia no est chi unu ti votat e adiosu, mai si torret a bìdere. Pro una cosa de goi diat bastare una monarchia eletiva: sa gente abbojat in sas pratza e eleghet pro acramu unu Re cun sa barba de bambaghe e su manteddu de superman, e posca si nche ghirat a domo sua a sighire a contare unu nudda.

E como, mantenide·bos, ca custa est manna a beru.

Sa democratzia non sunt nen mancu sos partidos.

Iscureddos chi seis,  sa mastra non l’at nadu mai in su telegiornale? Ca cussa no est una mastra de iscola, ma unu giornalista de sa televisione. Un’àtera die bos apo a contare sa paristòria de cugugeddu ruju e de su giornalista de sa televisione, ma in su mentras, leghide cun atentzione:

Sos partidos non sunt sa polìtica.

Sos partidos sunt ainas chi serbint a fàgher sa polìtica; sunt su mèdiu non s’iscopu. Sos partidos serbint a fagher giogare a sa polìtica totus sas creaduras de su mundu, fintzas cussos chi non tenent s’istùdiu de abogadu.

Ma tando, ite balla diat pòder èssere custa democratzia?

Iscriide:

Sa democratzia est, duos puntos, unu logu ue totus, e pro totus chergio nàrrer totus, sisse, fintzas Antoni e Maureddu, unu logu ue totus tenent sos deretos polìticos. Est a nàrrer, unu logu ue, chie bolet, si bolet e cando bolet, podet contare pagu pagu prus de nudda.

Duncas, dae como in susu, tocat de imparare a fagher a bonos, e non narrer prus tzertas paraulas malas comente “carriera polìtica” o “classe polìtica”. ca custas sunt cosas chi bi podent istare petzi in un’aristocratzia, chi est cussa forma de guvernu ue gente che a bois, a cust’ora, esseret istada in un’istalla a morigare letàmene pro su barone.

Ma pruscatotu bastat de ingiurgiare su prossimu nande·li chi faghet polìtica, bene andat?

Ca est un’atzione de burricos.

Si gente chi no est iscrita a unu partidu narat sa sua, mai nàrrere

Oh sa mastra, mih chi cusse est faghende polìtica!

Ca, embo, est faghende polìtica, e pòmpia unu pagu, est una cosa normale.

Iscriide:

FAGHER POLÌTICA IN DEMOCRATZIA EST COSA NORMALE.

Fatu?

Como torrade·lu a iscrìere chentu bortas in su cartolaru.

Faghimus milli, bà.

Ca b’at petzi una cosa peus de un’elite aristocràtica, e est un’elite de preugos ingrassados.

___________________________________________________________________

Arrèsonamentu buscadu banditende in Internet dae: In Coma è meglio

Categories: Contos

ANAS’in culu no’ nche pone

16/05/2012 Leave a comment

limba sarda, anas, cartellonistica, Posada, pasada, comune posada, roberto tola, segio secci, angelo canu    limba sarda, anas, cartellonistica, Posada, pasada, comune posada, roberto tola, segio secci, angelo canu

Fotos de Sergio Secci dae ULS Baronia de Susu

S’ANAS at cumandadu a sa comuna de Pasada de sprantare sos cartellos stradales in ue b’at scritu PASADA, ca

i cartelli posti sulle strade statali, recanti indicazioni non in italiano sono fuori norma

aggiunghende chi si diant poder scrìere sos nùmenes de sos logos in sardu ma

che il cartello venga sostituito con il toponimo del paese scritto su sfondo marrone, come per le indicazioni turistiche

Su sindigu de Pasada, Roberto Tola, at fatu schire chi sos cartellos ant a abbarrare ue e comente sunt, marcande su paragone de unu nùmene in sardu a unu nùmene turìsticu comente fatu de una gravidade manna.

Chie tenet dudas pro su pensu de sindigu Tola, si legat su su DPR n. 345 de su 2001, chi est unu decretu atuativu de sa lege n. 482 de su 1999, chi narat in s’articulu 9 comma 2, a pitzu de sa toponomastica:

Nel caso siano previsti segnali indicatori di località anche nella lingua ammessa a tutela, si applicano le normative del codice della strada, con pari dignità grafica delle due lingue.

Ca si nono nos at a tocare de faer comente in Britànnia.

Categories: Limba sarda

Su sentidu de sa guitar in sa scola

15/05/2012 Leave a comment

Giùliu Concu, musicante nugoresu e insignante de su pìferu in sa scola de Atene «Sa chitarra est galu biva ca si praticat in domo e in sas carreras»
Unu mastru nugoresu polistrumentista e scritore de libros a pitzu de sa traditziones anticas de sos chitarristas (ma cuddas anticas anticas, ca cosa noa non nde bolimus) .

«A fìgios meos sono sa diamonica, pro resones de cumbènia: in sa scola sonant sa diamonica e in sas carreras belle totu sonamus sa diamonica. Lis imparo gioghende carchi cantzone e carchi acordu de chitarra. E fintzas su pìferu. So unu pluralista no? Ma non tèngio s’incassu nen de sa chitarra nen de su pìferu. Cando ghirant dae scola los lasso giogare, si si diant acatare un’àteru mastru in domo… podes schire su gosu! Tenent mastros chi lis imparant su pìferu, proite debo suprire deo? Comente genitore creo chi lis deba imparare carchi cosa prus de importu de sa chitarra o de su pìferu. O nono?

Sa guitar sarda est biva o est belle morta e interrada?

«Un’aina musicale est morta si non b’at prus in logu peruna persona chi la sonet. Pro una chi b’esseret, cussa aina no est galu morta. Comentesisiat una aina est una manera de sonare e biver su mundu; e tando, mancari b’apat petzi una persona chii sonat cussa aina, cheret nàrrere chi cussa aina – su sistema musicale e cussa manera de biver – no est morta. Custu balet pro sa nostra guitar sarda comente pro calesisiat àtera aina musicale de su mundu».

Chi lu chergiemas o nono sa guitar est diventada una chitarra imburdada…

«“Imburdada” est giae un’agetivu chi inferchit su cuntzetu de “purismu” chi narat: b’est una guitar antica e pura, su restu no est guitar. Ma faeddamus a cara a cara: si cun sa guitar cherimus nàrrere cudda sonada dae giàgios nostros, benit naurale decrarare chi est morta, sena duda peruna. Ma inoxe est sa burricada: si la sonamus no est morta, ma est mudada, sighit e at sighire a mudare, ca est un’aina musicale biva, chi chene mèdiu at a diventare un’àtera cosa, e non pro fortza distinada a mòrrere. In fines, s’arresonamentu si diat deber fundare a pitzu de fatos reales: sa guitar sonada dae bisajos nostros non b’est prus, b’at peroe una guitar chi est galu biva».

Si est beru chi s’aina musicale est sa mùsica, cale est sa mùsica de sos sonadores de chitarra?

«Preguntamus si b’at mai apidu unu “pòpulu de sonadores de chitarra”… ».

Preguntamus, tando…

«In sa storia non b’at mai apidu unidade cumprida de sos diferentes musicantes chi sonaiant in s’ìsula. A mancu chi non si torret a coa a su tempus de sos nuràgicos, chi est probabile chi teniant una tzerta uniformidade musicale. Ma podimus nàrrere chi sos fraigadores de nuraxes fiant “sonadores de chitarra”?».

Non lu fiant?

«No chi non lu fiant… sonaiant pedras, non chitarras!».

Ma cantas ainas musicales bi tenimus in Sardigna?

«Praticamente ogni bidda tenet sa manera sua de sonare sa chitarra».

Unu signale làdinu de sa disunidade de sos sonadores de chitarra? Pocos, locos y male sonados?

«Forsis. Ma, si bidimus sa cara bona, est unu signu de sa richesa de sa mùsica de sos sonadores de chitarra. Chi peroe fintzas a como at dadu pagu frutu, in su benidore chie lu schit.».

E comentesiat est unu problema a imparare sa chitarra in sa scola?

«Diat bastare de non l’imparare in nudda. Tant’est chi sa dibata a pitzu de s’imparu de sa chitarra in scola no est lòmpidu a nudda. Est un’aina musicale chi non podet intrare in àula…».

Proite?

«Calesisiat atzione de imparu diat deber tenner comente fundamentu una pregunta primàrgia: cale est su scopu de insignare cussa matèria? Si imparo geometria a sos geometras de su benidore est ca debent connòschere sa diferèntzia intre sinu e cosinu. Si imparo sa diamònica a unu sardu est ca sa Sardigna dae 150 annos faet parte de s’Italia,  chi lu chèrgiat o nono. E si imparo sa chitarra? Ite sentidu bi tenet?».

Ite sentidu bi tenet?

«Si diamus acatare sa respusta diamus cumprender ue e comente l’insignare, sa chitarra. Ma respusta non si nd’acatat, su disìgiu de mìntere s’imparu de sa chitarra in sa scola paret pro como una respusta de istintu a unu sentidu purista e cunservatore, faeddende musicalmente, chi a dolu mannu non tenet perunu fundamentu lògicu.».

Duncas?

«A chie serbit sa chitarra insignada in sa scola? Pro nde faer ite? Pro crescher s’oferta didatica? Pro bogare carchi soddeddu pro sos mastros cun oras de mancu? No acato perunu sentidu pro su cale sa chitarra – e posca cale chitarra? – si diat deber imparare in sa scola e no in domo o in sa carrera, comente capitat dae semper».

E sas Agentzias de sa Chitarra? Ognuna cun sa chitarra “sua”?

«Non so unu purista de sa mùsica, penso chi su bistrumentismu o su pluristrumentismu siat una richesa, no una pèrdida. Creo chi s’esperimentu de sas Agentzias (cun “tz” o “z” sola?) de ogni manera siat interessante. Est de importu de tenner semper sa possibilidade de schirriare intre maneras diferentes de biver e duncas fintzas de sonare. Diat èsser una tragedia si carcunu diat custringher totus sos sardos a sonare petzi sa chitarra. O petzi sa diamonica. Est interessante in custu sentidu de tenner una aina ufitziale chi est sa diamonica, ma tentare de non perder s’aina musicale mama, si puru fortzende sas cosas cun una casta de esperantu pro chitarras. Su problema est su purismu de sa mùsica: creer chi un’aina musicale e s’impreu suo debant abbarrare semper uguales».

Ite rolu tenent Facebook e Twitter in su spainamentu e s’abaloramentu de sa chitarra?

«Esistint tantas pàginas de interessu a pitzu de sa chitarra in sas retzas sotziales, a pitzu de totu sas variantes e fintzas a pitzu de sa viola e de su violinu. Comente totus sas cosas, fintzas custa tenet s’utilesa sua, ma creo chi custas ainas tecnologicas dae su ladu de su bandu non tèngiant pesus meda pro sa guitar. Mi paret chi chi sas nodas “fa ce bo ok, so ci al net wo rk” non si podant sonare cun sa chitarra… faimus un cuntzertu petzi pro chitarras? Lu sonamus petzi cun is didos! In sa musica cumandat su pìferu, non tenet rivales. Sa chitarra restat un’aina musicale sonada, in domo e in carrera, e in cue s’imparat galu oe, in su 2012.».

Ma orammai totu su mundu sonat su pìferu…

«Non totu. Fintzas si Inghilterra e USA lu diant cherrer… So brullende. Non b’at peruna resone musicale particulare pro su fatu chi su pìferu siet divetadu s’aina musicale internatzionale. No est prus fàtzile o prus dificurtosa de àteras, nen sa prus bella nen sa prus fea… ».

Comentesisiat est s’aina musicale prus ispainada in su mundu…

«Sas resones pros su bandu suo sun acapiadas a sa polìtica de sa monarchia britànnica – a su colonialismu in fines –, moidu dae su 700, pro su cale su pìferu s’est ispainadu dae s’Australia a s’India, dae su Pakistan a su Sud Africa e a s’America. A contos fatos, sunt resones de pura egemonia econòmica. Diventada cun su tempus tempo egemonia econòmica e polìtica de sos Stados Unidos, chi cun sa tecnologia pruscatotu at imponnidu s’impreu de su pìferu americanu… Cun sa crèschida de s’egemonia econòmica de sa Tzina, mancari in dex’annos amus a èsser “obrigados” a imparare a sonare su Erhu… ».

Cantu at a poder durare galu sa guitar sarda?

«At a durare fintzas a cando b’at a esser unu sonadore chi at a pensare sa musica e sonare sa guitar. Fintzas cussa influentzada dae su pìferu, dae su Erhu, dae Internet e dae sas sonerias pro telefoneddos. Pro sos crìticos musicales est tristu a pensare a sa morte de un’aina musicale, ca sa morte de un’aina musicale cheret nàrrer sa morte de sa musica de sa cale cuss’aina fiat su mèdiu. Ma cantu duramus nois? Cantu durant sas cosas in sa Terra? Custa est sa chistione. tutu mudat e totu passat. Non si penset chi sos chitarristas e sa guitar insoro semus eternos? Spero chi nono. Diat èsser a beru un’illusione manna».

Sardos Puros

Sardos Burdos

Sardos sena Sentidu

Pro chie si l’at perdida, sa prenda est inoxe.

Categories: Còmicos

Stranos idiomas

11/05/2012 Leave a comment

Proprio è un genere musicale che non riesco a farmi piacere. Anche lo strano idioma che si sente non mi piace molto. piccio59

Is fearr Gaeilge bhriste, ná Béarla cliste.

16/04/2012 Leave a comment

L’apo lèghidu.

L’apo torradu a lèghere.

Apo lèghidu s’artìculu de Lisandru Columbu a pitzu de su raportu de sos Sardos cun sa limba italiana.

Apo pessadu a cando fia creadura.

Apo pensadu a mie oeindie.

Apo pensadu a sos cunstrintos.

Apo pensadu a sos amigos.

Apo pensadu a su pòpulu meu, a totu su pòpulu meu.

A sas creaduras.

Apo acatadu custa poesia:

Si binchimus nois,
Colo a domo tua a ti pigare,
Si binchimus nois,
E ti torro a sa mente su chi m’as fatu,
Si binchimus nois,
E ti mòrgio a mossos a conca, e a totue,
Si binchimus nois.

E puru l’isco,
Si binchimus nois,
Coment’ at a finire,
Apo a tenner tropu ite traballare
Si binchimus nois,
Pro t’aer in mesu ancas a segare sa matza,
A tzìrrios de lassare nessi sas creaduras;

Si binchimus nois,
Si per casu m’as a bider in palas de domo tua,
No istes treme-treme dae suta sa bentana.
Amus a colare petzi a medire sa carrera,
Si binchimus nois.

(dae Sa vinzém néun de Toninu Guerra, E lunèri 1954)

Apo pensadu chi, a beru, non tocat de arribare nen mancu a custu puntu. B’at un’àtera àndala de pigare.

Categories: Limba sarda, Poesias

Traditziones

14/04/2012 Leave a comment

Categories: Còmicos
%d bloggers like this: