Archive

Archive for the ‘Còmicos’ Category

Su sentidu de sa guitar in sa scola

15/05/2012 Leave a comment

Giùliu Concu, musicante nugoresu e insignante de su pìferu in sa scola de Atene «Sa chitarra est galu biva ca si praticat in domo e in sas carreras»
Unu mastru nugoresu polistrumentista e scritore de libros a pitzu de sa traditziones anticas de sos chitarristas (ma cuddas anticas anticas, ca cosa noa non nde bolimus) .

«A fìgios meos sono sa diamonica, pro resones de cumbènia: in sa scola sonant sa diamonica e in sas carreras belle totu sonamus sa diamonica. Lis imparo gioghende carchi cantzone e carchi acordu de chitarra. E fintzas su pìferu. So unu pluralista no? Ma non tèngio s’incassu nen de sa chitarra nen de su pìferu. Cando ghirant dae scola los lasso giogare, si si diant acatare un’àteru mastru in domo… podes schire su gosu! Tenent mastros chi lis imparant su pìferu, proite debo suprire deo? Comente genitore creo chi lis deba imparare carchi cosa prus de importu de sa chitarra o de su pìferu. O nono?

Sa guitar sarda est biva o est belle morta e interrada?

«Un’aina musicale est morta si non b’at prus in logu peruna persona chi la sonet. Pro una chi b’esseret, cussa aina no est galu morta. Comentesisiat una aina est una manera de sonare e biver su mundu; e tando, mancari b’apat petzi una persona chii sonat cussa aina, cheret nàrrere chi cussa aina – su sistema musicale e cussa manera de biver – no est morta. Custu balet pro sa nostra guitar sarda comente pro calesisiat àtera aina musicale de su mundu».

Chi lu chergiemas o nono sa guitar est diventada una chitarra imburdada…

«“Imburdada” est giae un’agetivu chi inferchit su cuntzetu de “purismu” chi narat: b’est una guitar antica e pura, su restu no est guitar. Ma faeddamus a cara a cara: si cun sa guitar cherimus nàrrere cudda sonada dae giàgios nostros, benit naurale decrarare chi est morta, sena duda peruna. Ma inoxe est sa burricada: si la sonamus no est morta, ma est mudada, sighit e at sighire a mudare, ca est un’aina musicale biva, chi chene mèdiu at a diventare un’àtera cosa, e non pro fortza distinada a mòrrere. In fines, s’arresonamentu si diat deber fundare a pitzu de fatos reales: sa guitar sonada dae bisajos nostros non b’est prus, b’at peroe una guitar chi est galu biva».

Si est beru chi s’aina musicale est sa mùsica, cale est sa mùsica de sos sonadores de chitarra?

«Preguntamus si b’at mai apidu unu “pòpulu de sonadores de chitarra”… ».

Preguntamus, tando…

«In sa storia non b’at mai apidu unidade cumprida de sos diferentes musicantes chi sonaiant in s’ìsula. A mancu chi non si torret a coa a su tempus de sos nuràgicos, chi est probabile chi teniant una tzerta uniformidade musicale. Ma podimus nàrrere chi sos fraigadores de nuraxes fiant “sonadores de chitarra”?».

Non lu fiant?

«No chi non lu fiant… sonaiant pedras, non chitarras!».

Ma cantas ainas musicales bi tenimus in Sardigna?

«Praticamente ogni bidda tenet sa manera sua de sonare sa chitarra».

Unu signale làdinu de sa disunidade de sos sonadores de chitarra? Pocos, locos y male sonados?

«Forsis. Ma, si bidimus sa cara bona, est unu signu de sa richesa de sa mùsica de sos sonadores de chitarra. Chi peroe fintzas a como at dadu pagu frutu, in su benidore chie lu schit.».

E comentesiat est unu problema a imparare sa chitarra in sa scola?

«Diat bastare de non l’imparare in nudda. Tant’est chi sa dibata a pitzu de s’imparu de sa chitarra in scola no est lòmpidu a nudda. Est un’aina musicale chi non podet intrare in àula…».

Proite?

«Calesisiat atzione de imparu diat deber tenner comente fundamentu una pregunta primàrgia: cale est su scopu de insignare cussa matèria? Si imparo geometria a sos geometras de su benidore est ca debent connòschere sa diferèntzia intre sinu e cosinu. Si imparo sa diamònica a unu sardu est ca sa Sardigna dae 150 annos faet parte de s’Italia,  chi lu chèrgiat o nono. E si imparo sa chitarra? Ite sentidu bi tenet?».

Ite sentidu bi tenet?

«Si diamus acatare sa respusta diamus cumprender ue e comente l’insignare, sa chitarra. Ma respusta non si nd’acatat, su disìgiu de mìntere s’imparu de sa chitarra in sa scola paret pro como una respusta de istintu a unu sentidu purista e cunservatore, faeddende musicalmente, chi a dolu mannu non tenet perunu fundamentu lògicu.».

Duncas?

«A chie serbit sa chitarra insignada in sa scola? Pro nde faer ite? Pro crescher s’oferta didatica? Pro bogare carchi soddeddu pro sos mastros cun oras de mancu? No acato perunu sentidu pro su cale sa chitarra – e posca cale chitarra? – si diat deber imparare in sa scola e no in domo o in sa carrera, comente capitat dae semper».

E sas Agentzias de sa Chitarra? Ognuna cun sa chitarra “sua”?

«Non so unu purista de sa mùsica, penso chi su bistrumentismu o su pluristrumentismu siat una richesa, no una pèrdida. Creo chi s’esperimentu de sas Agentzias (cun “tz” o “z” sola?) de ogni manera siat interessante. Est de importu de tenner semper sa possibilidade de schirriare intre maneras diferentes de biver e duncas fintzas de sonare. Diat èsser una tragedia si carcunu diat custringher totus sos sardos a sonare petzi sa chitarra. O petzi sa diamonica. Est interessante in custu sentidu de tenner una aina ufitziale chi est sa diamonica, ma tentare de non perder s’aina musicale mama, si puru fortzende sas cosas cun una casta de esperantu pro chitarras. Su problema est su purismu de sa mùsica: creer chi un’aina musicale e s’impreu suo debant abbarrare semper uguales».

Ite rolu tenent Facebook e Twitter in su spainamentu e s’abaloramentu de sa chitarra?

«Esistint tantas pàginas de interessu a pitzu de sa chitarra in sas retzas sotziales, a pitzu de totu sas variantes e fintzas a pitzu de sa viola e de su violinu. Comente totus sas cosas, fintzas custa tenet s’utilesa sua, ma creo chi custas ainas tecnologicas dae su ladu de su bandu non tèngiant pesus meda pro sa guitar. Mi paret chi chi sas nodas “fa ce bo ok, so ci al net wo rk” non si podant sonare cun sa chitarra… faimus un cuntzertu petzi pro chitarras? Lu sonamus petzi cun is didos! In sa musica cumandat su pìferu, non tenet rivales. Sa chitarra restat un’aina musicale sonada, in domo e in carrera, e in cue s’imparat galu oe, in su 2012.».

Ma orammai totu su mundu sonat su pìferu…

«Non totu. Fintzas si Inghilterra e USA lu diant cherrer… So brullende. Non b’at peruna resone musicale particulare pro su fatu chi su pìferu siet divetadu s’aina musicale internatzionale. No est prus fàtzile o prus dificurtosa de àteras, nen sa prus bella nen sa prus fea… ».

Comentesisiat est s’aina musicale prus ispainada in su mundu…

«Sas resones pros su bandu suo sun acapiadas a sa polìtica de sa monarchia britànnica – a su colonialismu in fines –, moidu dae su 700, pro su cale su pìferu s’est ispainadu dae s’Australia a s’India, dae su Pakistan a su Sud Africa e a s’America. A contos fatos, sunt resones de pura egemonia econòmica. Diventada cun su tempus tempo egemonia econòmica e polìtica de sos Stados Unidos, chi cun sa tecnologia pruscatotu at imponnidu s’impreu de su pìferu americanu… Cun sa crèschida de s’egemonia econòmica de sa Tzina, mancari in dex’annos amus a èsser “obrigados” a imparare a sonare su Erhu… ».

Cantu at a poder durare galu sa guitar sarda?

«At a durare fintzas a cando b’at a esser unu sonadore chi at a pensare sa musica e sonare sa guitar. Fintzas cussa influentzada dae su pìferu, dae su Erhu, dae Internet e dae sas sonerias pro telefoneddos. Pro sos crìticos musicales est tristu a pensare a sa morte de un’aina musicale, ca sa morte de un’aina musicale cheret nàrrer sa morte de sa musica de sa cale cuss’aina fiat su mèdiu. Ma cantu duramus nois? Cantu durant sas cosas in sa Terra? Custa est sa chistione. tutu mudat e totu passat. Non si penset chi sos chitarristas e sa guitar insoro semus eternos? Spero chi nono. Diat èsser a beru un’illusione manna».

Sardos Puros

Sardos Burdos

Sardos sena Sentidu

Pro chie si l’at perdida, sa prenda est inoxe.

Categories: Còmicos

Traditziones

14/04/2012 Leave a comment

Categories: Còmicos

Traballu eguu.

10/04/2012 Leave a comment

Categories: Còmicos

Sundàgios de Chida Santa

07/04/2012 Leave a comment

Categories: Còmicos

A Giorgi viadore in Sardigna

18/02/2012 Leave a comment

Miràbile protetore,

Chi per Deus podes tantu,

tor.     Giorgi  Presidente, illustre Santu

          de Itàlia resplendore.


In Casteddu ses cumpartu

a sa luxe de su mundu,

Trastu brutu e moribundu,

chi tantu fragu as ispartu;

acramadu cale scartu

de santu celeste sortore.

Giorgi Presidente…


Celestiale Carabinu,

chi cumparis resplendente,

ti decraras presidente

in sa Bidda ‘e su Ziminu;

e t’acramant Serrafinu

sende in terra papadore.

Giorgi Presidente…


De sa prima gioventude

ses dae totus ammiradu,

carrarmados ant mandadu

pro modellu de virtude;

a sa paxe e a sa salude

acollesis cun favore.

Giorgi Presidente …


Sa probatica pischina

est dae totus renomada;

mirat sa gente spantada

sa bundantzia de s’urina,

e lis paret meixina

pro s’afannu e su dolore.

Giorgi Presidente …


Preigadore famosu

dutore in Potestade

giovaneddu in frisca edade

fatu Presidente prodigiosu;

totus che babai amorosu

ti recramant unu favore.

Giorgi Presidente …


Ses semper acumpangiadu

dae mirabiles portentos,

t’obbidint bellos elementos,

s’America t’at respetadu;

su Patu as cunfirmadu

pro masellu e terrore.

Giorgi Presidente …


Bidet su pòpulu atontadu

custu novellu Caronte,

aberinde perenne fonte

pro sullievu a s’emigradu,

chie no est mortu est cuadu,

pro su dèbbile est rigore.

Giorgi Presidente …


Cun portentu strepitosu

paxe sotziale cuncruida,

creschet in arbore frorida

su bastone nodosu,

pro s’errante e su dudosu

dennuntzias prontu s’errore.

Giorgi Presidente …


Cappellatzu t’at tzerriadu

chi in pràngiu sias o in chena,

cun insufrìbile pena

dae pretas sias assartadu;

una gruxe a su malasortadu

est s’esertzitu tuo infestadore.

Giorgi Presidente …


Pro cussu reconnoschente

cun Claudia sa reina,

celebrende sa deina

fortza tua onnipotente,

a sa Sardigna prontamente

richesa furades e onore

Giorgi Presidente …


Aronne sacrifighende,

Mosè ses in potèntzia,

Geremia in elocuèntzia,

unu Pàulu preighende,

terribile reprendende

su sardu traballadore

Giorgi Presidente …


O Santu tant’ammiradu

dae su Pòpulu Italianu,

dae su tronu soberanu

aunde regnas subrimadu

a chine t’at invocadu

dona s’eternu puntore.

tor.     Giorgi Presidente, illustre Santu

          de Itàlia resplendore.

_____________________________

E si per casu ti narant “Presidente venga con noi a vedere il Carnevale!”, tue bae trancuillu, chi sos Sardos a Re Giorgi lu cherent bene

Neutrinos

25/09/2011 Leave a comment

http://xkcd.com/955/

Figura de unu:

– Intesu as su contu de sos neutrinos prus lestros de sa luxe?

– Embo! Bella noa, mi serbiat unu paghixeddu de dinari.

– Ah? Dinari?

Figura de duos:

– Eja. In antis, cando essiat una noa a pitzu de unu stùdiu scientìficu chi podiat revolutzionare totu sa fìsica connoda, a su solitu cunsigiaia a de abbarrare cautelos, ammentende a sa gente chi sos ispertos non sunt castigados, e de règula nche la finia in arresonos chene sentidu a pitzu de Galileo.

– (A su telèfonu) No, non semus ponende in chistione s’esistèntzia de sa relativitade, ca si no esseret istada, su GPS tuo non aiat pòidu funtzionare…

– … ite balla cheret nàrrer “scientzia mandada a dae in antis cun grabu ‘e giustitzia“? Ma bista l’as sa sienda chi tenimus? Non nos podimus permìtere a seguru sa psico-politzia nostra.

Figura de tres:

– Mi paret una faina trista e de iscunortu.

– In beru est gai. E duncas apo lassadu pèrdere, e como chirco petzi gente dilliriada in disìgiu de crèder a custa noas, e scommito cun ognunu de issos 200 € chi custa scuberta noa non at a règher cun su tempus.

Figura de bator:

– Est un’atzione de bàrbaros.

– Si bi balàngiat meda, e in casu mi faddire, apo a èsser tropu cuntentu de sa fìsica noa pro mi rènder contu de sa pèrdida econòmica

___________________________________________________________________________

In italianu inoghe: http://www.borborigmi.org/2011/09/23/fare-soldi-con-i-neutrini-superluminali/
Categories: Còmicos Tags: , ,

Gherreras

05/08/2011 Leave a comment

%d bloggers like this: