Home > Scièntzia > Càmpanas cantu-mecànicas

Càmpanas cantu-mecànicas

Un’istudiu de acùstica e frùidu-dinàmica at analizadu sa tremidura de su metallu e de s’abba de una càmpana tibetana e at iscubertu chi respondent a frecuèntzias pretzisas.

Sas càmpanas tibetanas sunt gupos chi si fraigant iscagiende sete metallos diferentes, ognunu de sos cales est, cunforma sa religione tibetana, su singiale de unu corpus tzeleste: s’oro est su Sole, sa prata sa Luna, su mercùriu est Mercùriu, su ràmene est Vènere, su ferru est Marte, s’istagnu est Giobe e su prumu Saturru.

Ogni càmpana est unu petzu ùnicu, chi sonat a diferente secunde sa forma, sa proportzione, e sa grussària de sas pitzas de metallu. Pro seculos sunt serbidas pro meledare e precare, ca su sonu chi faghent est s’OM, su sonu primitiu chi s’est intesu cando est nàschidu s’Universu.

Est unu tumbu chi incantat fintzas sos profanos, e galu de prus incantant sos tzurrigheddos ispantosos chi si formant cando su gupu est prenu de abba e si frigat cun unu matzucu oru oru, comente si bidet in su video:

Su tremore de su metallu incripit s’abba, chi s’aggranghigionat.  E gosi si formant trumas de gutios chi parent pulighes a brinchidos in pitzu de abba.

S’ispiegatzione fìsica de custu fenomenu est meda cumpricada e galu a comprire de su totu. Bi sunt proande Denis Terwagne de s’Universidade de Liegi e John W. M. Bush de su Dipartimento de Matematica de su MIT de Boston. Su traballu insoro est pubricadu in sa revista Nonlinearity.

Pro si figurare unu modellu bastante bonu, lis est tocadu de torrare a palas in s’istoria de sa fisica e recuberare sas ideas de Michael Faraday, chi in su 1831 aiat mustradu comente unu frùidu orizontale, cando benit trèmidu in su sentidu verticale, suta unu certu tantu de acradiadúra si nch’abbarrat nedu. A supra de custu tantu, ‘aggranghigionat e chilliat cun una frecuèntzia paris a sa metade de sa chi ispinghet.

Manu manu chi sa fortza de incarcu creschet, est a nàrrer manu manu chi si fricat prus lestru su matzucu, naschint undas de formas prus froridas, finas a cando diventat unu burdellu caòticu e s’abba s’isperrat e si formant gutios chi rebotant, rodulant e lassinant supra ‘e su pitzu, mantenendesi intreos. Sos scentziados las giuliant walkers “caminadores”.

Pro chi sos gutieddos abbarrent, tocat chi rebotent a una pretzisa frecuèntzia, chi est su mesu de sa frecuèntzia de incarcadura in s’oru de su gupu, gasi chi intrent in cuncordu cun sas undas chi si formant a pitzu de abba.

In prus, tocat de agatare una cunditzione meda acanta sa làcana scuberta dae Faraday, in manera chi sas undas prus ampras  e longas, nche goddant sos gutieddos giustu giustu comente falant.

In custa manera, ogni gutiu rebotat in costas de s’unda chi s’est formada in sa falada in antis e retzit unu corpu semper in su matessi sentidu, moende a sa matessi lestresa in una pretzisa andala.

S’esperimentu si podet pretziare bene in custu video

Ma custos isperimentos non sunt gioghiteddos. Sunt importantes de se, ma fintzas ca podent agiuare a tènnere unu modellu pro su cumportamentu curiosu de sas partigheddas elementares, chi in fìsica benint giuliadas cantos elementares.

Sa mecànica de sos cantos elementares est una parte de sa fìsica chi istudiat comente si cumportant sas cosigheddas minores minores, tantu piticas chi no est pòssibile a las annodare a ogru nudu e nen mancu a su microscòbiu.  Semus faeddande de cosas comente eletrones, protones, àtomos e molèculas.

Cando una cosa est gasi minoredda tenet unu cumportamentu meda diferente dae sas cosas fitianas. Un’eletrone est meda diferente dae unu cantu de pedra  (chi puru, est formadu dae tantos eletrones). Un’eletrone tenet cumportamentos chi a bortas assemigiant a sos de una pedra, ma a bortas a sos de un’unda de mare. Dipendet dae comente andamus a l’osservare, dae su tipu de esperimentu e de mesuras chi faghimus. Sa mecànica de sos cantos est una teoria fisica chi mustrat e previdit comente si cumportant custu tipu de partigheddas. Mancari deet arràngiu meda a si figurare una de custas partigheddas cun sos cuntzetos chi tenimus in su fitianu, est una teoria esata, fintzas a oe.

Una de sas isfidas mannas de sa fisica de sos cantos, est pròpriu a cumprèndere cale est sa mannaria pretzisa a suta de sa cale una cosa non si cumportat cunforma sa teoria de sos cantos elementares.

Sus gutios chi si formant in sas càmpanas tibetanas, sighint sa fisica classica e totu. Ma essende formados dae unu frùidu, tenent unu cumportamentu chi a bortas est su de un’unda a bortas est su de una pedra. Pròpriu comente sos cantos elementares. Duncas, pro sa prima bia, si tenet unu sistema macroscòbicu, chi est reguladu dae leges assemigiantes a sas de sa mecànica de sos cantos.

Sa pregunta manna tando est si, custas campanas pro meledare, podent èssere a beru unu modellu macroscòbicu de su cumportare cantu-mecànicu. Ca sos gutios “caminadores” tenent unu dòpiu fàgher, de partighedda e de unda, e bi podet essire una fisica noa dae custos istùdios.

Pigadu dae http://oggiscienza.wordpress.com/2011/07/19/i-segreti-delle-campane-tibetane/

____________________________________________________________________________________________

Cust’iscritu est a su 100% sardu pedrale, itesisiat chi nde pensent retores e sutabanchitos. A mancu de isballios non cherfidos chi, si mi signalades, apo a currègere, totu sas paràulas impreadas sunt sardas DOC, IGP e ascras de raju, nen prus e nen mancu de chie las iscriet.

E si non bos andat bene, bos cussìgio de pompiare prima de totu sas regulas de custu logu.

Bos ammento finas chi totu su chi iscrio deo lu lego in bithichesu. Si bois non bi la faghides a lu lègher cunforma su faeddu bostru, cheret nàrrer chi bos mancat sa crae. Tenides su deretu de la pedire a s’ufitziu linguisticu de bidda bostra, in pare a totu s’agiudu chi bos podet serbire pro lèghere e iscrìere su sardu bostru. Si non sunt capatzos chessade·bos cun sa RAS.

Si pròpriu non agatades nessune de bos agiuare, podides ròmper sa matza a mie, chi a discassu (si est pro de badas) bos potzo fagher bìder comente apo fatu deo cun su bithichesu, e comente torrare una grafia (calesisiat) a su faeddu bostru.

Advertisements
  1. No comments yet.
  1. No trackbacks yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: