Nèbulas in su Chìghinu

APOD de su 19/11/2010

Nèbulas in su Chìghinu
Credit & Copyright: Rolf Geissinger

In custa isparta de chelu esplorades una regione de nèbulas, ispantosa e complessa, isterrida  in su pianu de sa Galàssia nostra, su Caminu ‘e sa Patza. Sa matzine mustrat sas nues de gassu cosmicu in una bista de 25 x 25 grados tzentrada in s’asterismu famadu de su Chìghinu (Cygnus), cramadu puru sa Rughe de su Nord. In diagonale s’agatant: su lughente isteddu supergigante Deneb (dae s’arabu Dhaneb “sa coa”), chi ammustrat sa coa de su Chighinu (o su cabu de sa rughe), Sadr (“su petus” in arabu), chi est acanta a su tzentru, e su maravilliosu Albireo (su nùmene est istadu istropiadu cun su tempus, ma in s’originale arabu est “su picu de sa pudda”). Ponende su cursore a supra de sa matzine (*) si reconnoschent logos meda populares de abbistare cun su telescòbiu. Sas regiones de emissione de su Nord America e de su Pelicanu, sa nèbula de sa Mariposa (IC 1318), e sas nèbulas de sa Creschente e de sa Vela. A manu destra de Deneb e a sutta de Sadr b’est una parte prus iscura, si narat su Saccu ‘e su Carvone de su Nord. Est intundada dae nues interstellares lampantes e dae campos de isteddos carcos. Foras de sa rughe a bia de Albireo comintzat un’ordine de nues de prùere iscuras, chi formant sa Badde Manna (Great Rift) de su Caminu de sa Patza. Custas nues de su Chìghinu sunt totu a 2000 annos-lughe dae inoghe, e, in pare a su Sole, sunt collocadas in su bratzu a ispirale de Orione de sa Galàssia nostra.

(*) Inoghe sutta agatades sa matzine cun sos ogetos a craru, o si cherides andade a la pompiare in su giassu de APOD